യാത്ര

കാലം വഴിവെട്ടുന്നു
കണ്ട കൈ ചേർത്ത് തുടങ്ങുന്നു
കൈ വിട്ടവർ മറയുന്നു
കൈ കോർക്കാൻ ആള് വരുന്നു
കൈ വിട്ടു വിശ്രമിക്കുന്നു
കൈ കോർത്തവർ തുടരുന്നു

യാനങ്ങൾ

സങ്കല്പവും ഓർമ്മയും
സമയാന്തര യാത്രായാനങ്ങൾ

ചിരിജീവിതം

ജനിമൃതികൾക്കിടയിലൊരു
ചെറുചിരി മാത്രം ജീവിതം
ചരിത്രമാവർത്തനം ആദ്യം
ദുരന്തം പിന്നെ വെറും ചിരി 

മഴ

ആകാശത്തിന്റെ പ്രണയം
ഭൂമിയെ ചുംബിക്കുന്നതാണ് മഴ 

പിറന്നാൾ ..

പുരുഷായുസ്സ് പൂർത്തിയാവുന്നു
ലോകം കീഴ്മേൽ മറിയ്ക്കാൻ
കരുതീട്ടു കഴിഞ്ഞില്ലാ ഇപ്പൊ
തലകുത്തി നിന്ന് നോക്കുവാ 

മരണപ്രതീക്ഷ

കാത്തിരിക്കാൻ ആരും ഏതും
ഇല്ലാത്തവർക്ക് മരണവും ഒരു പ്രതീക്ഷയാണ്
പരലോകത്തിൽ ഒരാൾ
കാത്തിരിക്കാൻ ഉണ്ടാകും എന്ന പ്രതീക്ഷ

പിഴ

പിഴയ്ക്കാത്ത ചുവടുകൾക്കുള്ള
പുറപ്പാടിൽ വച്ചതു അത്രയും
പിഴച്ചു പോയെന്നു അറിയാൻ
പിന്നെയും  ഏറെ  വൈകി